شوية أفكار جربتها مع ولادى و بفضل الله نتيجتها أفضل كتير من الأمر المباشر، دة غير إنها بتربط الولاد بدينهم أكتر و تثبتلهم مفهوم إن الإسلام دين عملى لإصلاح الأحوال و ليس مجرد نظريات..
× لو ولادك الاتنن بيتخانقوا سوا كالعادة ، دايما قوليلهم "استعيذوا بسرررعة خلو الشيطان يطلع برة الأوضة مش عاوزينه معانا المقرف دة اللى بيحب يزعل الناس من بعض".. و إللى يرفض يستعيذ، قوليله: "براحتك خااالص، خليك كدة مصاحب الشيطان النهاردة و عمال يتنطط حواليك كدة من ودنك اليمين لودنك الشمال و تسمع كلامه لحد ما هيدخلك معاه النار".. ابنك هيفرغ طاقة العداوة اللى جواه حاليا ناحية عدوه الحقيقى و نبقى ضربنا كذا عصفور بحجر واحد
× لو ابنك بيسمع لأخوه القرءان عشان انتى مشغولة شوية، و بيتعصب عليه وهو بيصححله التسميع، قوليله: "لا لا لا هات المصحف أنا إللى هسمعله أنا.. أنا إللى هساعده عشان ربنا يساعدنى، و انا إللى هاخد الحسنات على كل حرف عشر حسنات.. مش إنت إللى هتاخد دة كله لنفسك. طبعا هيتزرزر و يقولك بعصبية: "لأ خلاااص أنا إللى هسمعله، أففف".. قوليله: "لا طبعا ما ينفعش، إللى بيعمل صدقة و يئذى اللى قدامه بعدها و يمن عليه بيها و هو بيعملها له بيبقى زى اللى بيمشى عالصدقة بأستيكة بالظبط.. ربنا قال {لا تبطلوا صدقاتكم بالمن و الأذى} فخسارة بعد دة كله كمان ما يتكتبلكش الحسنات"
ابنك هيهدا بجد .. و هيتحفز للدفاع عن حسناته
× لو ابنك ساعات بيعيط من تسميع سورة صعبة الحفظ شويتين عليه، و يعيط و يزعق عشان التسميع بيضيعله ربع ساعة كاملة من وقت اللعب طبعا ، خدى منه المصحف بهدوء خالص و قوليله: "لا لا لا اوعى تعيط خالص و لا تزعل نفسك يا حبيبى و تعيط ليه بس دة كلام ربنا حبيب الكل.. لا لا ، اقفل المصحف و سيب القرءان لأهل القرءان أهل الله و خاصته و حبايبه"
ابنك هيزعل و ينكمش و يتحفز للدفاع عن مقامه وسط أهل القرءان
* لو ابنك بيكذب، كل ما يكذب سدى مناخيرك و قوليى بقرف: "أففف ابعد عننا بسرعة أففف أففف".. طبعا هيسأل: "فيه إيه يا ماما؟!".. قوليله: "الملايكة بتبعد عن اللى بيكذب من نتن ما قال، و احنا كمان بنعمل زيها" .
هيتأثر بجد و هتسيب علامة بالتكرار بعون الله..
× لو ابنك عمل سيئة قوليله: "الحق بسررررعة استغفر عشان تتمسح من عالشمال يا حبيبى قبل ما الشيطان ينسيك".. و اول ما يستغفر قوليله: "الحمد لله اتمسحت اخيراااا، كنت خايفة تموت قبل ما تلحق تشيلها"..
بتزرعى جوة ابنك المسارعة بالتوبة دوما و الخوف من لقاء الله فى أى لحظة بمعاصى، زائد معنى إن الموت ما بيستأذنش.
× لو ولادك مكسلين يعملوا لك خدمة، قولى بصوت مسموع: "مين الولد الطيب الحنين حبيب الحسنات إللى هيعمل لى كذا كذا و هدعيله يدخل معايا قصرى فى الجنة؟".. والله هتلاقيهم بيتخانقوا على برك و مساعدتك
× لو ابنك بيكسل ينزل يصلى فى المسجد، قوليله: "خسارة كان نفسى تبقى ضمن ضيوف ربنا النهاردة عموما ربنا هيستقبل ضيوف غيرك النهاردة فى بيته عز و جل و هيكرمهم آااااخر كرم و انت مش موجود للأسف، ربنا قال {و إن تتولوا يستبدل قوما غيركم ثم لا يكونوا امثالكم} ، ربنا يسترررر عليك " .. .
× لو ابنك عنده بوادر بخل، علميه إن البونبوناية أو البسكوتاية أو اللعبة اللى هيتصدق بيها على إخوانه أو المساكين، دى له هو مش لحد تانى، قوليله: "ابعت بونبونايتك أو لعبتك دى على صندوق الكنز بتاعك فى الجنة، حوشها هناك، عشان هى فى الدنيا كدة كدة هتخلص، و مش هتلاقيها تانى غير فى الجنة أكبر بكتييير و طعمها أحلى كمان، اللى بيبخل بيخل على نفسه" ..
×بدل ما تقوليله صلى الضحى.. اسأليه " تصدقت عن مفاصلك النهاردة يا حبيبى؟"
×بدل ما تقوليله طلع صدقة.. اسأليه "بعت لنفسك هدايا النهاردة فى الجنة يا حبيبى؟".. اسأليه "طفيت غضب ربنا النهاردة يا حبيبى؟" ..
×بدل ما تقوليله قول الأذكار.. اسأليه "حصنت نفسك النهاردة يا حبيبى من الحسد و الشيطان و الناس؟"..
×بدل ما تقوليله سبح 100 مرة.. اسأليه "أعتقت ال 100 رقبة بتوع النهاردة يا حبيبى ؟"..
×بدل ما تقوليله قوم صلى الفرض.. قوليله "يلا بينا نشحن البطارية" أو "يلا نكلم ربنا".. او "يلا نرد عالمنادى"..
×بدل ما تقوليله اقعد اقرا قرءان، قوليله "انا رايحة أقعد مع حبيبى شوية، تيجى معانا؟ *(القرءان يعنى)
×بدل ما تقوليله اقعد بين المغرب و العشا فى الجامع.. اسأليه "عملت رباط فى سبيل الله النهاردة يا حبيبى؟"
ليست هناك تعليقات :
إرسال تعليق